Fagnám í umönnun fatlaðra

Breyttar áherslur í starfi með fólki með fötlun kalla á aukna fagmennsku og markvissa starfsþróun þannig að starfsfólk geti veitt framsækna og metnaðarfulla þjónustu.

Námið miðar að því að auka færni og þekkingu á aðstæðum og þörfum fólks með fatlanir í því skyni að efla lífsgæði þeirra og virkni. Þar er lögð áhersla á sjálfseflingu, lífsgæði og réttindi fólks með fatlanir.

Námið er skipulagt í samræmi við námskrá Fræðslumiðstöðvar atvinnulífsins.

Námið spannar 324 klukkustundir en 164 stundir eru með leiðbeinanda og 160 stundir án leiðbeinanda (starfsreynsla/þjálfun).

Mennta- og barnamálaráðuneytið hefur samþykkt að meta megi námið til allt að 16 eininga á framhaldsskólastigi. 

Kennsla fer fram í vefnámi á Teams seinni part dags, tvo virka daga og í staðnámi einn til tvo laugardaga í húsnæði MSS að Krossmóa 4a, 230 Reykjanesbæ, 3. hæð.

Eingöngu félagsmenn aðildarfélaga og samstarfssjóða Starfsmenntar geta skráð sig hér á námskeiðið.
Aðrir verða að skrá sig hjá MSS.