Hvaða reglur gilda um uppsagnir og önnur starfslok hjá ríki og sveitarfélögum?

Á námskeiðinu verður fjallað um helstu reglur sem gilda um starfslok hjá opinberum stofnunum. Umræðan snýst um þær kröfur sem gerðar eru til stjórnenda við hagræðingaraðgerðir og ákvarðanir um að fækka starfsfólki, samkvæmt dómaframkvæmd og álitum umboðsmanns Alþingis. Farið verður yfir háttsemi sem getur varðað áminningu hjá starfsfólki ríkis og sveitarfélaga samkvæmt lögum nr. 70/1996 um réttindi og skyldur starfsmanna ríkisins og ákvæðum kjarasamninga og þær kröfur sem gerðar eru til áminningarferlis.

Sérstök áhersla verður lögð á að skoða hvernig stofnanir þurfa að tryggja gagnsæi, andmælarétt og virðingu í áminningarferlinu, þar á meðal hvað þarf að koma fram í rökstuðningi áminningar. Einnig verður rætt um hugsanlegar breytingar ef kynnt frumvarp um afnám áminningarskyldu verður að lögum, ástæður þess að reglur um uppsagnir eru ólíkar eftir því hvort þær byggja á hagræðingu eða frammistöðu og að hvaða marki opinberum stofnunum er heimilt að semja við starfsfólk um starfslok.

Helstu umfjöllunarefni:

• Kröfur til stjórnenda við hagræðingaraðgerðir og fækkun starfsfólks
• Háttsemi sem getur varðað áminningu samkvæmt lögum og kjarasamningum
• Áminningarferli: gagnsæi, andmælaréttur og rökstuðningur
• Hugsanlegar breytingar við afnám áminningarskyldu
• Ólíkar reglur um uppsagnir vegna hagræðingar vs. frammistöðu
• Heimildir til að semja um starfslok

Umfjöllunin verður studd dæmum og þá m.a. vísað til nýlegra dóma Landsréttar og álita umboðsmanns Alþingis og dóma Hæstaréttar.