Starfsmótun – árangursrík leið til að njóta sín í starfi!

Vilt þú taka þátt í að móta eigin starf og auka þar með eigin ánægju og árangur?

Starfsmótun (e. Job Crafting) er markviss leið til að auka eigin vellíðan og árangur í starfi. Rannsóknir um starfsmótun hafa ítrekað sýnt fram á jákvæð áhrif hennar á virka helgun í starfi (e. work engagement) sem jafnframt dregur úr líkum á kulnun í starfi.

Á þessu námskeiði verður farið yfir helstu þætti í starfsumhverfinu sem styðja við vellíðan í starfi. Jafnframt er lögð áhersla á hvað það er sem einstaklingar geta sjálfir gert til að hlúa að eigin vellíðan í vinnu með því að móta eigin störf út frá áhugasviði sínu og styrkleikum í takt við markmið skipulagsheildar.

Fjallað verður um hvað felst í vellíðan í starfi, hvað það er sem dregur úr vellíðan og eykur líkur á kulnun í starfi. Jafnframt er farið yfir mikilvægi stuðnings í starfi, góðra samskipta og í hverju það felst. Auk þessa er rætt um áhrif þess að hafa hafa skýra ábyrgð í starfi sem og frelsi til athafna um hvernig verkin eru unnin og útfærð. Sagt er frá fjölmörgum raundæmum um hvernig starfsfólk hefur mótað störf sín til að bæta eigin líðan í starfi. Dæmin eru m.a. frá frá viðmælendum í meistararitgerð leiðbeinanda en þar var rætt við 10 sérfræðinga, sem njóta sín í starfi, til að læra af þeim hvað það er í starfsumhverfinu og hvað þeir hafa sjálfir gert til að hlúa að eigin velferð í starfi.