Hvaða reglur gilda þegar ráða á starfsfólk hjá ríki og sveitarfélögum?

Á námskeiðinu er fjallað um margvíslegar hliðar á ferli opinberra ráðninga og þær kröfur sem gerðar eru til stjórnvalda á hverju stigi. Farið er yfir hvenær auglýsingaskylda virkjast, hvaða kröfur eru gerðar til efnis auglýsinga og að hvaða marki heimilt er að breyta störfum eða flytja fólk á milli þeirra án nýrrar auglýsingar.

Sérstök áhersla er lögð á reglur um hæfnis- og matsviðmið umsækjenda og það svigrúm sem stofnanir hafa við endanlegt val. Þá er fjallað um upplýsingarétt umsækjenda, hvaða gögn ber að afhenda, mögulegar takmarkanir á þeim aðgangi og hvernig standa eigi að vönduðum og fullnægjandi rökstuðningi fyrir ráðningu.

Jafnframt er horft til framtíðar og velt upp álitaefnum varðandi notkun gervigreindar við meðferð ráðningarmála. Umfjöllunin er studd hagnýtum dæmum þar sem meðal annars er vísað í nýlega dóma Landsréttar, Hæstaréttar og álit umboðsmanns Alþingis.

Efnistök

• Undirbúningur og auglýsingaskylda
• Matsferlið og hæfni umsækjenda
• Upplýsingaréttur og gagnsæi
• Framtíðin og tæknin
• Réttarframkvæmd og raunhæf dæmi