Ás styrktarfélag | Hrós og gagnrýni

Á þessu námskeiði er leitast við að styrkja stjórnendur í að veita faglega og áhrifaríka endurgjöf - bæði í formi hróss og gagnrýni - svo að samskipti á vinnustað verði lipur og traust.

Ein algengasta niðurstaðan úr vinnustaðarkönnunum á Íslandi er að fólki finnst það fá of litla endurgjöf þ.e. of lítla gagnrýni á það sem betur mætti fara og of lítið hrós. Gagnrýni reynist mörgum stjórnendum og starfsmönnum erfið enda getur óvönduð gagnrýni auðveldlega dregið dilk á eftir sér í samskiptum. Algeng viðbrögð eru að fólk verður reitt og sárt eða lætur eitthvað flakka á móti. Eðlilega veigra margir sér við því að veita endurgjöf og láta þögnina duga. En hvernig á að gagnrýna?

Vandamálið við að hrósa er af aðeins öðrum meiði. Fólk vill fá hrós fyrir vel unnin störf en þegar viðkomandi fær svo hrós er tilhneiging til að gera lítið úr því. Vel veitt hrós þarf því að rökstyðja og útskýra ef vel á að vera.

Skoðuð verður aðferð Marshall Rosenberg (höfundur Non-Violent Communication), hagnýt og áhrifarík leið í fimm einföldum skrefum um það hvernig eigi að gagnrýna þannig að fólk fari ekki í vörn.

Hugmyndir fleiri fræðimanna um málefnið munu koma til tals, s.s. Kerry Patterson, Joseph Grenny, Ron McMillan og Al Switzler.