Kynheilbrigði í starfi með fötluðu fólki

Hvernig styðjum við örugga og opna umræðu?

Fatlað fólk hefur sama rétt og aðrir til kynlífs, sjálfsfróunar, nándar og sambanda. Þrátt fyrir það hefur umræðan oft verið tabú eða hreinlega gleymst í þjónustu og daglegu starfi. Afleiðingin getur verið skortur á fræðslu, óöryggi, skömm og rangar eða óraunhæfar hugmyndir um kynlíf og sambönd. Á námskeiðinu fær starfsfólk sem vinnur með fötluðu fólki fræðslu og hagnýt verkfæri til að taka faglegar, virðingarfullar og opnar umræður um kynheilbrigði.

Námskeiðið byggir á mannréttindum fatlaðs fólks og hvernig starfsfólk getur skapað örugg rými þar sem einstaklingar fá fræðslu, stuðning og tækifæri til að læra um eigið kynheilbrigði. Lögð er áhersla á að nota einfalt og rétt orðaval, fræðileg heiti yfir líkamshluta og kynfæri og að ræða málin

Einnig verður fjallað um mikilvægi einkarýmis, mörk, samþykki og hreinlæti. Sérstök áhersla er á hvernig starfsfólk getur komið í veg fyrir skömm, vanlíðan og óöryggi og í staðinn skapað traust, öryggi og heilbrigða umræðu.

Að loknu námskeiði er starfsfólk betur í stakk búið til að ræða kynheilbrigði og hreinlæti sem eðlilegan hluta líkamsþroska, forðast fordóma og tabú, og styðja einstaklinga við að byggja upp jákvæða og virðingarfulla sjálfsmynd.

Á námskeiðinu er fjallað um

• Líkamsþroska, kynþroska og hreinlæti (t.d. hárvöxt, blæðingar, svitalykt, umhirðu kynfæra)
• Kynheilbrigði, sjálfsfróun og einkarými
• Kynlíf, sambönd, samþykki og kynhneigð
• Heilbrigt kynlíf, getnaðarvarnir, kynsjúkdómar og vernd gegn ofbeldi
• Hlutverk starfsfólks í að skapa öryggi og veita aðgengilegt samtal
• Samskiptamynstur og orðaval starfsfólks
• Að fjarlægja skömm og tabú í daglegu starfi
• Fræðslu sem hæfir þroska og skilningi einstaklings
• Rétt einstaklings til einkalífs og friðhelgi
• Viðbrögð við óviðeigandi kynferðislegri hegðun
• Að styðja heilbrigða líkamsvitund og sjálfsmynd
• Kynlífsmenningu, klám og áhrif samfélagsmiðla